Hagiye kuboneka akarusho mw’itangwa ry’umuyagankuba

Mu kiganiro categuwe n’ishirahamwe “Regideso” ku banditsi n’abamenyeshamakuru, igenekerezo rya 2 Ndamukiza 2013, Umushikiranganji w’amasoko ntanganguvu, ubutare n’agataka, Côme Manirakiza yamenyesheje ko vuba cane iryo shirahamwe rizotangura gukoresha ama mashine azoba ashobora guhingura megawate cumi z’umuyagankuba ku musi.

Umushikiranganji avuga ko naho ikibazo co gukurakuranwa mu kuronka umuyagankuba kitazoba gitorewe inyishu, bizotanga akarusho kuko umuyagankuba ugabanganirizwa abanywanyi uzokwongerekana.

Kubw’uwujejwe kumenyesha amakuru mw’ishirahamwe Regideso, Claudine Nininahazwe, mu gihe c’ici twimirije, urugezo rw’umuyagankuba ruragabanuka cane kuko amazi agabanuka mu ngomero kubera ubukene bw’imvura. Ubwo buryo bushasha buzofasha mu gusahiriza aho umuyagankuba uzoba wakenye.

Ku kibazo co kumenya ko aho umuyagankuba wahora ukunda kubura mu duce tumwe tumwe bazowuronka, ashikiriza ko bazosabikiraniriza abanywanyi bose.
Ku kibazo co kumenya ko namba vy’ukuri igihugu gikurikirana itunganwa ry’urudandazwa rw’ubutare, umushikiranganji yibukije ko ari naco catumye Leta y’Uburundi ifata ingingo yo guhagarika gushika mu kwezi kwa gatanu ibikorwa vyo gucukura ubutare, kugira hajeho amategeko abitunganya, gutyo na Leta ihakure akunguko.

Umuyobozi mukuru w’ishirahamwe Regideso yibukije ko abanywanyi bidoga ko barihishwa amafaranga y’umurengera mu gisata c’amazi ko bashobora kwitura ababijejwe muri iryo shirahamwe, mu misi itarenga indwi, bakabona gutunganirizwa.