Hari abariko basaba indishi y’akababaro Mbonimpa

Mu gihe Petero Karaveri Mbonimpa aheva asubira kurenguka mu butungane, hari na bamwe mu bavuga ko badenderejwe nawe bahava barenguka, kandi bakazoba bazanywe n’ugusaba indishi y’akababaro.

Petero Karaveri Mbonimpa akaba amaze igihe mw’ibohero rikuru rya Mpimba yagirizwa kuba yashatse guhungabanya umutekano mu gihugu no hanze yaco, mu kuvuga ko hari urwaruka rw’abarundi ruriko ruragirira imyimenyerezo ya gisirikare mu gihugu ca Repuburika iharanira intwaro rusangi ya Kongo. Amashirahamwe mpuzamakungu n’ayo mu Burundi, akaba yariyamirije iryo pfungwa ry’uyo asanzwe arongoye ishirahamwe riharanira agateka ka zina muntu n’akabanyororo APRODH.

Ku bw’umushingwamanza Armel Niyongere umwe mu basanzwe bamuburanira, asaba abacamaza baza gusasa mu rubanza rwa Mbonimpa rwo kuri uyu wa 5 igenekerezo rya 4 Mukakaro, kuza kwigenga vy’ukuri. Nayo mu mashirahamwe adaharanira inyungu za poritikeFORSC, bagasaba abanyagihugu bose babishoboye kuza gusidukana n’iyonka gushigikira Mbonimpa, kandi baze bambaye n’impuzu zifise ibara ry’urwatsi rubisi.