Hari umugambi wo gutunganya igisagara ca Bujumbura gushasha

Hari umugambi wo gutunganya igisagara ca Bujumbura ukundi gushasha hisunzwe ubuhinga bwa none, uburyo bukazotangwa n’umugambi mpuzamakungu PNUD.

Kugira igisagara ca Bujumbura gitunganywe kandi ukundi gushasha hisunzwe ubuhinga bwa none bwo kwubaka (plan Directeur Innovant de la ville de Bujumbura), Reta y’Uburundi iherutse gushira igikumu ku masezerano yo gufashanya hagati y’igihugu c’Uburundi na Reta ya Singapour, nk’uko bishikirizwa na Jean claude Nduwayo arongoye ubushikiranganji bw’amazi, ibidukikije, gutanganya amatongo n’ibisagara. Ibikorwa bikaba bizokorwa ku mafaranga agera ku miriyaridi zitatu n’igice z’amafranga y’amarundi, yose akaba azotangwa n’umugambi PNUD.

Uwo mushikiranganji amenyesha kandi ko mu ntumbero yo gutunganya amatongo, uburaro bw’abanyagihugu no gutunganya ibisagara mu gihugu, ibibanza 15 arivyo biriko biratunganywa mu gihugu cose, ku buringanire bungana n’amahegitari agera hafi 1576, aho ubushikiranganji buzoshobora kuronkamwo ibibanza vyo kwubakamwo 14106 bizoronswa abanyagihugu. Ubwo bushikiranganji bumenyesha ko bwagiranye amasezerano n’ishirahamwe ARREDA HOMES LIMITED, muri ayo masezerano hakaba hazokwubakwa inzu zigera ku 6.592, aho abakozi ba Reta bazoronswa inyubakwa bitabagoye, bakazohora bariha buke buke mu kiringo kirekire.

Ubwo bushikiranganji kandi bumenyesha ko ibwirizwa ritunganya amatongo, n’ibwirizwa ritunganya ibisagara n’inyubakwa rija ryarateguwe muri kino gihe hakaba hariko haremezwa.amategeko ashira mu ngiro ibwirizwa rigenga amatongo naryo.
Umushikiranganji akaba yabishikirije mu gihe ubushikiranganji arongoye bwari buramutse bushira ahabona ivyaranguwe muri ano mezi atandatu arangiye.