Hiroshi Naka, yagenywe kuba icegera c’umukuru w’ibanki nkuru y’isi yose

Hiroshi Naka niwe yaraye agenywe kuba icegera gishasha c’umukuru w’ibanki nkuru y’isi yose, akaba n’umushikirizwa mukuru w’amajambo mw’ibanki.

Umukuru w’ibanki nkuru y’isi yose Jim Yong Kim, kuri uyu wa gatanu wa 23 Rusama 2014, niho yagena Hiroshi Naka, kuba icegera gishasha c’ibanki nkuru y’isi yose akaba n’umushikirizwa mukuru w’amajambo mw’ibanki. Hiroshi Naka, afise amamuko yo gihugu c’Ubuyapani, akaba yaramaze imyaka 25 akora mu gisata c’ubutunzi mu gihugu c’Ubuyapani, akagira n’ubumenyi bwo gukorana n’amashirahamwe, mu migenderanire n’ayandi makungu. Muri ico gisata, akaba ariho yanonosoreye ibibazo bijanye n’ubutunzi, vyo kurwanya inyonora ry’ubutunzi bw’igihugu hamwe no gukurikiranira hafi ukungene ibisata vy’ubutunzi n’amabanki bikora.

Umukuru w’ibanki nkuru y’isi yose Jim Yong akaba yamenyesheje kuri uyu wa gatanu igenekerezo rya 23 Rusama 2014, ko ubumenyi (Expertise) Hiroshi Naka afise bwo gutunganya no gukurikirana neza ibikorwa vy’amabanki hamwe n’amashirahamwe mpuzamakungu akorana nayo, buzofasha cane kurushirizaho guteza imbere ibanki nkuru y’isi yose.

Mwomenya ko Naka Hiroshi yagenywe kuba mu mabanga y’ubuyobozi butunganya ibikorwa vyose bijanye n’ubutunzi bw’ibanki, yongere abe n’uwukurikiranira hafi ibikorwa vy’intwaro mw’ibanki nkuru y’isi yose. Amabanga yiwe akaba agiye kuzotangura neza mu kwezi kwa Mukakaro 2014.