Hope Africa University yafashe ingingo yo kwongereza umutekano mu bigo vyayo

Kaminuza yitiriwe Umwizero wa Afrika (Hope Africa University) yafashe ingingo yo kwongereza umutekano mu bigo vyayokuva hatanguye kwibonekeza umutekano muke mu gisagara ca Bujumbura.

Igikorwa co gusaka abinjira canke basohoka,bagenda n’amaguru canke n’imodoka mu bigo vya kaminuza yitiriwe Umwizero wa Afrika,iri muri zone ya Ngagara mu gisagara ca Bujumbura.

Amakuru ava mu bajejwe umutekano mu bigo vya kaminuza Umwizero wa Afrika,akemezwa n’ubuyobozi bwa kaminuza,amenyesha ko kuva ico gikorwa gitanguye gukorwa haraheze iminsi itanu,inkoho zibiri imwe yo mu bwoko bwa Pistolet iyindi yo mu bwoko bwa kalashinkov iri kumwe n’ibisandugu bitatu vy’amasase biramaze gufatwa.

Ayo makuru nyene amenyesha ko izo nkoho zose zafatanywe abapolisi b’igihugu ariko bambaye umwambaro usanzwe w’abanyagihugu.

Mu buyobozi bwa kaminuza bavuga ko ingingo yo gukomeza umutekano bayifashe mu ntumbero yo gukinga ingorane y’umutekano yokwaduka mu bigo vya kaminuza mu gihe isanzwe ari kaminuza ifise abanyeshuri benshi kandi bava mu bihugu bitandukanye.

Abanyeshuri nabo nyene barashima iyo ngingo.Bavuga ko ariko yafashwe iteba kuko ikigo nk’ica kaminuza categerezwa gukingirwa umutekano bihagije.