Ibanki ya Repuburika y’Uburundi irahumuriza abafise amakonte y’amafaranga y’agaciro

Ibanki nkuru ya Repuburika y’Uburundi imenyesha ko ata mugambi uhari w’ukwugara ububiko (Comptes) bw’abantu bafise amafaranga y’agaciro, nk’uko bimaze iminsi bivugwa.

Haraheze iminsi hari amakuru acishwa ku mbuga ngurukanabumenyi avuga ko hagiye kwugarwa amakonte y’amafaranga y’agaciro y’abanywanyi b’amabanki y’ubudandaji, ayo makuru akavuga kandi ko hagiye gusohoka itegeko rituma amabanki avunja ku nguvu amafaranga y’agaciro y’abanywanyi bayo.

Jean CIZA, umuyobozi mukuru wa banki nkuru y’igihugu

Mw’itangazo yasohoye, ibanki nkuru ya Repuburika y’Uburundi yabeshuje ivyo bivugwa. Ciza Jean, umuyobozi mukuru wa banki nkuru y’igihugu yamenyesheje ko ivyo bivugwa ata kindi bigamije atari ukujuragiza n’uguca ivutu abanywanyi b’amabanki y’ubudandaji, akavuga ko ivyo navyo bishobora guhungabanya ubutunzi bw’igihugu.