Ibendera rya BNUB ryamanuwe rishikirizwa Reta y’Uburundi

Ibendera ry’ubuserukizi bw’ishirahamwe mpuzamakungu ONU mu Burundi (BNUB) ryamanuwe kuri uwu wa gatanu. Iryo bendera ryashikirijwe uwari yaserukiye Reta y’Uburundi muri ivyo birori, bikaba vyerekanye ko BNUB isozereye ibikorwa vyayo mu Burundi.

Mu gatondo ko kuri uwu wa gatanu, imbere y’abaserukira ibihugu vyabo mu Burundi, ibendera rya BNUB (Bureau Integré des Nations au Burundi) ryahora rihungabana mu nyubakwa z’ahahora hakorera BNUB, ryamanuwe, rishikirizwa Jeffrey Fletman, icegera c’umunyamabanga mukuru w’ishirahamwe mpuzamakungu ONU ajejwe ibibazo vya poritike, uwo nawe aca arishikiriza umushikiranganji Laurent Kavakure, umushikiranganji ajejwe imigenderanire y’Uburundi n’ayandi makungu. Iryo bendera ryamanuwe nk’ikimenyetso c’uko ubuserukizi bw’ishirahamwe mpuzamakungu ONU mu Burundi (BNUB) busozereye ibikorwa vyabwo.

Muri ivyo birori, Jeffrey Fletman, icegera c’umunyamabanga mukuru w’ishirahamwe mpuzamakungu ONU ajejwe ibibazo vya poritike, yamenyesheje ko naho BNUB igiye, ONU idahevye Uburundi, kuko bazoguma hafi Reta n’abanyagihugu, mu bikorwa vy’iterambere ry’igihugu.

Tubibutse ko ibiro vya BNUB mu Burundi bizokwugara nyezina kw’igenekerezo rya 31 Kigarama 2014.