Ibikorwa vy’ibarabara Bukeye - Butaganzwa - Gahombo - Gatara bigiye gusubirwamwo

Mu kigo kijejwe amabarabara (office des routes) baremeza ko ibikorwa vy’ibarabara Bukeye - Butaganzwa – Gahombo – GATARA vyaranzwemwo utunenge tutari duke, nk’uko vyashikirijwe n’ishirahamwe ryishinze kurwanya igiturire n’abanyonyeza amatungo ya Reta Olucome.

Mu gihe ishirahamwe OLUCOME (observatoire de la lutte contre la corruption et les malversations économiques) riherutse gusemerera ko ibikorwa vy’ibarabara Bukeye - Butaganzwa - Gahombo - Gatara ririko rirakorwa nabi. Mu buyobozi bukuru bujejwe amabarabara, baremeza ko nabo nyene ko ivyo bikorwa vyaranzwemwo utunenge tutari duke. Nk’uko bimenyeshwa na Desiré Masumbuko ubu hakaba hari abahinga batandukanye kugira bakurikiranire hagufi ivyo bikorwa, mbere bikaba bigiye gucungerwa gushika bihere kuko vyibonekeje ko hoba harabayemwo ubunyonyezi.

Ishirahamwe EBENNES ryari ryahawe isoko rikaba ryongewe ikiringo c’amezi abiri kugira rizobe ryarangije ibikorwa ryongere rikosore utunenge twagiye tuboneka, aho ni mu gihe ryategerezwa gukora ivyo bikorwa mu kiringo c’amezi 6. Iryo barabara rikaba rizotwara uburyo bungana amafaranga y’amarundi 680.000.000.

Tubibutse ko ishirahamwe OLUCOME ryavuga ko ritewe impungenge ku vyerekeye ubwaguke bwaryo (largeur),imiserege hamwe n’ububi bw’ibikoresho hamwe na nyene guhabwa isoko kuko yoba azwi cane mu bunyonyezi.