Ibisabwa kugira abakenyezi n’abigeme bagire igikiriza ciza

Igikiriza ni igihimba c’umubiri gikwiye kubungabungwa neza na cane cane igikiriza c’abapfasoni n’abigeme kuko ari igihimba gikunda kubangamirwa n’indwara zitandukanye.
Igikiriza n’igihimba gisanzwe gikundwa cane, haba ku ruhande rw’abagabo, haba ku ruhande rw’abakenyezi.

Hari abantu benshi bibaza ko kugira igikiriza ciza bisabwa kuba bava mu muryango kanaka canke kuba ari ba rurangiranwa, bigaca bibatuma bisuzugura, ntibihe agaciro, ugaca usanga mbere batanakicitayeho. Iyo umuntu yifashe neza, agira amagara meza kandi agasa neza.

Ku bakenyezi no ku bigeme bafise amabere bari bakwiye kurushirizaho kwifata neza kuko usanga umubiri wabo uhindagurika bivanye n’ihindagurika ry’ibihe. Hari n’abusanga igikiriza gihindutse kubw’ukungene baba bonsa. Ariko n’ubwo biri uko, ntivyotera intambanyi kugira bashobore gukingira igikiriza cabo.

Hari uburyo umuntu ashobora gukoresha kugira igikiriza n’amabere bikingirwe, bigire n’amagera meza. Ubwo buryo nabwo ni nk’ubu :

1. Gusiga amavuta igikiriza iminsi yose

Amabere meza usanga akundwa cane. Igikiriza c’abakenyezi ni igihimba coroshe gikenewe kwama kibomvye iminsi yose. Amavuta niyo akwiye kugira umubiri w’igikiriza ukingirwe bimwe bikwiye, kugire niyo uri kuzuba kigume kibomvye. Igihimba co ku mabere coco usanga coroshe cane, iyo utagisize amavuta, umubiri ucumera nk’uwukwegutse, ivyo navyo akaba atari vyiza ku gikiriza.

2. Akabeho karatuma igikiriza kimera neza

Kenshi iyo hakanye canke iyo umuntu avuye kwiyoga umubiri wose, usanga igikiriza kimeze nk’igikomanye. Ku bakenyezi no ku bigeme hoho bica biboneka, kuko iyo hashushe, umubiri uba umeze nk’uwukwegutse, mu gihe hakanye naho, amabere yabo aba ameze nk’ayakomeye igikiriza kigahagarara neza. Muri ico gihe, n’amaraso araheza agatembera neza mu gikiriza, bigasabwa rero ko umuntu yoca aza arayakorakorako, ivyo bita mu gifaransa « massage » kugira, yambaye na kamwe gafata amabere ntikamubabaze.

3. Kugira imyimenyerezo ibayabaye

Nk’uko bivugwa ko abantu binonora imitsi bagira amagara meza n’umubiri unonotse, kugira imyimenyerezo ibayabaye igihe cose, biratuma n’igikiriza kimera neza. Abakenyezi n’abigeme bafise igikiriza kinini, usanga bafise ingorane yo kwinonora kuko baba baremerewe n’igikiriza baba bafise. Arikorero, kugira igikiriza gikomere, ntibisaba kugira imyimenyerezo ikomeye, bisaba ahubwo kugira imyimenyerezo ibayabaye iminsi yose. Aho twovuga nko kwoga mu mazi « natation », gutambuka canke ivyo bita yoga, biratuma imitsi yo mu gikiriza inonoka neza.

Mu bushakashatsi bwakozwe vyaragaragaye ko ku binonora imitsi badakunda kubangamirwa naza ndwara zikunda gufata mu gikiriza, nka kanseri, uburuhe bw’igikiriza, ububabare mu mabere, n’izindi.

4. Kwambara agahuzu gafata amabere neza

Agahuzu gafata amabere, bita « Soutien-gorge », nika nkenerwa cane, yaba ku wufise amabere manini, yaba ku wufise amabere mato. Ako gahuzu ko munsi gafasha gukingira igikiriza, mbere n’amabere akagira n’iforoma nziza. Ni vyankenerwa rero ko abakenyezi n’abigeme bose bafise amabere, bomenya kwambara agahuzu gakwiranye n’amabere baba bafise, kuko iyo bambaye ibidahwanye n’amabere canke igikiriza, bishobora gutuma atamererwa neza muriwe.

Ikindi naco co kwirinda, ni kuguma mwambaye umwanya muremure twa duhuzu bambara bagiye kwoga canke bicaye ku musenyi « maillot de bain », kwambara uduhuzu dutuma umubiri ushuha cane, kugira imyimenyerezo ikomeye, guta no kwongerana kw’ibiro bidasiguritse.

5. Kugaba cane ku gikiriza canyu

Ubu birazwi cane ko indwara ya kanseri ibangamira igikiriza n’amabere y’abakenyezi kandi bikaba bitaraba imyaka baba bafise ari naco gituma ari vya nkenerwa ko bokwama baja k’umuganga w’abakenyezi kwisuzumisha n’imiburiburi rimwe mu mwaka.
Hari abakunda kugira amakenga iyo babonye bafise igikiriza n’amabere bivyimvye bagaca basimbwa n’umutima ko atoba ari ibimenyetso vya kanseri. Ku bw’amakuru ava mu magara y’abantu, igikiriza kinini sico cerekana ko hoba hari ibitagenda neza, nico gituma bahanura abakenyezi n’abigeme kwisuzumisha inyuma yaho baba bavuye m’ubutinyanka kuko igikiriza kiba casubiriye kugabanura ubunini n’uburemere cari gifise.
Akenshi mu buzima hari ibintu usanga bidushikira kuko biba vyatuvuyeko. N’indwara zo mu gikiriza hari igihe aba ari twebwe tuba twatumye zihaba kuko tutaba twamenye kwikingira mbere.Twige gukurikiza impanuro tuba twaronse kugire tukingire amagara yacu, tubashe kworoherwa mu buzima.