Gitega : Ibohero ribangamiwe n’ubwinshi bw’abapfunzwe

Ibohero ryo mu ntara ya Gitega ryari rigenewe abanyororo 400, ubu rifise abagera hafi amajana indwi, nk’uko bivugwa na Emmanuel Niyonkuru arirongoye.

Iryo bohero ryubatswe mu mwaka w’1926, rikaba ririmwo abagabo barenga 600, abagore 34 hamwe n’abana 2. Igitigiri c’abanyororo cahavuye kiba umurengera, Emmanuel Niyonkuru akavuga ko ivyo biri mu mabohero nka yose. Ariko rero uko iryo bohero ryubatse, ni uko abagabo n’abagore baba mu makaratiye atandukanye, abana b’abayabaga nabo baba ahegereye abagabo. Kubera ingingo ya Reta yo gutezurira abanyororo bamaze ica kane c’umunyororo bigenza neza, igitigiri cabo kigenda kigabanuka.

Amakosa akunda kwagirizwa abanyororo ni menshi, ariko ayibonekeza cane ni ayajanye n’ubusuma, ukudandaza ibidandazwa vyaguzwe bidaciye mu mategeko, abafata abigeme canke abakenyezi ku nguvu abakozi bo mu gikoni basambanya abana bareze, abagore canke abigeme bica abana babo n’abapfunzwe bagirizwa ko bagandaguye abagabo canke abagore babo. Ikindi giteye isibe, avuga ni abanywa canke badandaza urumogi bigashika mbere bakarunywera mu busho, canke mu mabohero. Ubu rero abajejwe gucungera ibohero rya Gitega amenyesha ko bararikanura, ku buryo n’uwugemuye bamusopa.

Aho baboneye ko bikomeye abagemura bajanwa na tubiri, baciye bafata umugambi bise “Gutibura”. Uwo nawo, ni uw’abantu bamwe bamwe bafata igitekero c’urumogi, baterera imbere mu rugo rw’ibohero, hanyuma abanyororo bari imbere nabo bakagitora. Uwurongoye iryo bohero, akaba avuga ko atabatoroka, abajejwe gucungera iryo bohero bagerageza kurikanura, kugira ntihagire uwobaca mu mwanya w’intoke.