Accueil > Poritike > Icicaro gikuru ca EAC cuguruwe muri Tanzaniya
Icicaro gikuru ca EAC cuguruwe muri Tanzaniya
vendredi 30 Munyonyo 2012
Ku musi uyu wa gatatu, igenekerezo rya 28 Munyonyo, umukuru w’igihigu Petero Nkurunziza, yarafashe urugendo rumushikana Arusha muri Tanzaniya aho yagiye guhurira na bagenziwe basangiye ishirahamwe rya Afirika y’ubuseruko mu birori vyo kwugurura icicaro c’iryo shirahamwe. Inyuma y’aho azoca aja muri Kenya.
Ibiro vyo kumenyeshamakuru vy’umukuru w’igihugu bivugaga ko umukuru w’igihugu yagiye Arusha mu birori vyo kwinjira icicaro gikuru c’ishirahamwe rya Afirika y’ubuseruko kumwe na bagenziwe basangiye iryo shirahamwe. Inyuma y’aho, bitegekanijwe ko bazoca baja muri Kenya aho bazugurura icese ibarabara rya kijambere Arusha-Namanga-Athi River, rifise uburebure bw’ibilometero 240.
Ivyo bikorwa bizotangurwa n’inama igira 14 y’abakuru bibihugu bigize akarere ka Afrika y’ubuseruko, ibera i Nairobi ku murwa mukuru wa Kenya hagati y’amagenekerezo ya 29 na 30 Munyonyo. Nk’uko ayo makuru abandanya abimenyesha, ngo muri iyo nama, harategekanijwe ishirwaho ry’abarongora iryo shirahamwe. Iryo naryo, ngo rigiye kurongorwa n’ubuganda, hama u Burundi bwegukire ikibanza c’umunyamabanga nshigwabikorwa.
Ndayikengurutse Jean Michel