Ico uri uno munsi cerekana ico uzoba ejo hazoza

Burya ico uri uno munsi cerekana ico uzoba ejo hazoza kandi nico uri uno munsi ugiterwa n’ico wari ejo haheze nico gituma umuntu yari akwiye gutegura neza ejo hazoza mu buzima bwiwe kuko ico wipfuza kuzoba utegerezwa gutangura kugitegura ubu.

Iyo uravye neza usanga ici ciyumviro arico kandi kivuga ukuri kuko iyo uganiriye n’abantu benshi bakubwira ko ico bari ubu batanguye kugitegura kera bakiri bato. Iyo uganiriye n’abantu benshi bakomakomeye mbere bafise ivyo barongoye canecane nk’abanyepolitik ndetse n’abandi bari mu vyicaro bitandukanye bakubwira ko ico bari batanguve kucitegurira bakiri bato bisigura ko babiharaniye bica bituma biga amashuri ajanye n’ivvo bashaka kuzoba bica bituma kandi bakora ukwo bashoboye kugirango intumbero yabo bazoyishikeko.

Nk’akarorero usomye kahise k’umukinyi rurangiranwa Lionel Messi, yatanguye kuboneka ko afise ingabire yo gukina umupira w’amaguru akiri umwana muto, ivyo navyo bica bituma nawe abikurana kandi abigira integuro yo kuzoba umukinyi rurangiranwa maze abitegura neza kandi intumbero yiwe ubu yarayishitseko.

Iyo uravye rero mu buzima busanzwe canecane nko k’urwaruka, iyo uri nk’umusore canke umwigeme bikaba vyarakunaniye gufata ingingo yo gukunda umukobwa umwe canke umusore umwe kenshi mbere n’iyo wubatse urugo rwawe usanga rudakomeye kuko gukwirwa n’umugore umwe canke n’umugabo umwe birakugora kuko ico wari ukiri urwaruka cerekana ico uzoba muri kazoza kawe.

Nico gituma rero umuntu wese yarakwive guharanira gutegura neza ejo hazoza hiwe kandi twese tugize iyo ntumbero bishobora gutuma ibintu bihinduka ku buzima bwacu ndetse no ku gihugu cacu.