Icuka si ciza hagati y’abahinyanyuzi Black Arthur na Jonny B

Umuhinyanyuzi Johnny B aridogera cane umuhinyunyuzi Black Arthur ku masanamu abiri yasohoye kw’izina ryiwe (Black Arthur) kandi atariwe yazikoze.

Umuhinyanyuzi Bigirimana Johnny

Johnny Bigirimana yemeza ko ari we yakoze amasanamu y’indirimbo zibiri, isanamu imwe y’ururirimbo rwa Ellyz na Ashley rwitwa "Me love u" hamwe n’iyindi y’ururirimbo rwa Patient Matabaro na R Flow rwitwa "Changu ni changu". Nk’uko Johnny abitubwira, Black Arthur yumvikana na bene indirimbo ibijanye n’amahera ibisigaye bigakorwa na Johnny. Uwo wanyuma yaciye asaba Black ko bogabura amahera hanyuma n’izina ryiwe rigashirwa mw’isanamu "Video". Johnny abandanya avuga ko ivyo bumvikanye Black Arthur atabishize mu ngiro. Amubajije igituma, Black Arthur yamwishuye ko bene ururirimbo boca babona ko atariwe yakoze iyo sanamu.

Icavyuye ukwo kutumvikana nyezina ni isanamu y’ururirimbo "Changu ni Changu" ya Matabaro na R Flow. Black Arthur ntiyahashe, yasubiye kwitura Johnny ngo amukorere isanamu y’urwo ruririmbo, Johnny ati : " Ubu umparurira amahera, ibijanye n’izina ndabiheba". Nk’uko Johnny ubwiwe abivuga, Black Arthur amaze kuyashira mu minwe, ntiyahaye Johnny n’ifaranga rimwe.

Uwo muhinyanyuzi ababazwa n’uko ariko ateza imbere Black Arthur, izina ryiwe rikamenyekana nk’umuhinyanyuzi karuhariwe kandi atari we akora. Ikindi n’uko n’amahera yakoreye atayamuhaye yose akaba kandi atitaba niyo amuhamagaye kuri ngendanwa yiwe. Johnny yafashe ingingo ko atazosubira gukorana na Black Arthur.

Twarondeye Black Arthur agire ico abivuzeko, ariko inomero baduhaye batubwira ko ngendanwa yiwe izimije, ariko tuguma tumurondera kugira ntirube ururimi rw’umwe rukamwe imfyufyu.

Umuhinyanyuzi Johnny azwi mu masanamu menshi y’indirimbo za Spok’s, za Snowcay wo mu murwi Overdo, za Dj Prince n’abandi.