Icuka si ciza hagati ya Ma Soridiars na Big Bass

Umurwi Ma soridiars n’umuhinyanyuzi Big Bass wa Menya Media Studio ntibumvikana na gato muri kino gihe bivanye n’indirimbo yari yaratanguye kubahinyanyurira mu nyuma ahagarika guheraheza iyo ndirimbo kandi baramurishe amahera yose bumvikanye.

Abo basore babiri Adelin na francois bakaba bagize umurwi Ma Solidiars baririmba umudiho wa Hip Hop.

Nk’uko bavyivugira , ngo mu minsi iheze bumvikanye n’umuhinyanyuzi Big Bass ko agiye kubahinyanyurira ururirimbo bari gukorana na Big Fizzo n’umurwi indimu. Icagiye kubatangaza ngo ni uko bagiye babona Big Bass atangura kubicira amasango bumvikanye kandi baramaze kumuriha amahera yose.

Ico yabakoreye ngo ni umuziki nawo utuzuye kugira babone ingene batangura gutegurana n’abo bazoririmbana. Inyuma y’aho bamubaza igihe bazoza kubandanya , isango abahaye rigeze akabaha irindi kugeza naho bamubwiye ngo abasubize amahera yabo akuyeko ayahuye n’ivyo amaze kubakorera aravyanka.

Ubu noneho ngo Big Bass baramuhamagara , telephone ntayitabe. Ivyo bikaba arivyo vyateye icuka kibi hagati y’uwo murwi ndetse n’uwo muhinyanyuzi.
Ku ruhande rwiwe, umuhinyanyuzi Bigg Bass ntaco yashimye kubivugako.