Igice c’amafaranga azokwubaka ingomero za Jiji na Murembwe yatanzwe

Umushikiranganji w’ikigega ca Reta Tabou Abdallah Manirakiza hamwe n’uwuserukira ibanki y’isi yose mu Burundi Rachid Radji, ku munsi wa kabiri barateye igikumu ku masezerano y’igice ca mbere c’amafaranga azokora mu mugambi wo kwubaka ingomero z’umuyagankuba kuri Jiji na Mulembwe, mu bumanuko bw’igihugu, kugira ingorane z’umuyagankuba zibonekeza mu Burundi zihere.

"Amasezerano y’igice c’amafaranga duhejeje guterako igikumu n’uwuserukira banki y’isi yose mu Burundi angana imiriyoni zine z’amadorare y’abanyamerika. Ayo nayo akazofasha mu bikorwa vyo gutegura kwubaka ingomero z’umuyagankuba, na cane cane akazokora nko kurondera abahinga bazoshigikira ibikorwa bimwe bimwe vyo gufasha ishirahamwe Regideso, mu gutegura neza uwo mugambi." Ivyo vyashikirijwe na Tabu Abdallah Manirakiza, umushikiranganji w’ikigega ca Reta. Yamenyesheje ko uwo mugambi watangujwe na Reta y’Uburundi, mu ntumbero yo kugwiza inyubakwa nyinshi mu vyerekeye amazi hamwe n’umuyagankuba. Uwo mugambi ukaba uzofatwa mu mu mugongo n’ibanki y’isi yose ku mafaranga arenga imiriyoni 70 z’amadorare.

Umushikiranganji Tabu Abdallah Manirakiza yamenyesheje kandi ko hariho n’umugambi wo kuraba ingaruka zoba ku bidukikijie no ku mibano mu gihe izo ngomero bozishizeho.