Igiciro c’ikiro c’ikawa y’Uburundi casubiriye kugabanuka

Igiciro c’ikawa y’Uburundi caheruka kuduzwa casubiriye kumanuka kiva ku mafaranga y’amarundi amajana atandatu ku kiro (600Frs/Kg) gishirwa ku mafaranga amajana atanu na mirongo itatu y’amarundi ku kiro (530Frs/Kg). Mu gisata gikurikirana ivy’ikawa INTERCAFE bamenyesha ko vyavuye ku giciro mpuzamakungu c’ikawa.

Abarimyi b’ikawa mu Burundi bari banezerejwe n’ukubona igiciro c’ikawa kidugijwe, bakameyesha ko bagiye kuhungukira. Uwo munezero wabo wamaze akanya gato, kuko mu gisata INTERCAFE kijejwe gukurikirana ivy’ikawa y’Uburundi bamenyesheje ko igiciro c’ikawa mu Burundi cakorotse kiva ku mafaranga y’amarundi amajana atandatu ku kiro (600Frs/Kg) gishirwa ku mafaranga amajana atanu na mirongo itatu y’amarundi (530Frs/Kg).

Oscar Baranyizigiye, umunyamabanga mpuzabikorwa wa INTERCAFE amenyesha ko ico giciro camanutse kubera ibiciro mpuzamakungu vy’ikawa.
Abarimyi basabwe kwihangana, barindire indwi zibiri, kuko ariho mu gisata kijejwe gukurikirana ikawa y’Uburundi INTERCAFE bazoraba namba igiciro c’ikawa y’Uburundi coshobora gusubira kuduzwa.