Igiporisi cahagarikiye hagati ikiganiro OLUCOME yari yateguriye abanyagihugu

Nk’uko bari bavyiyemeje, mw’ishirahamwe OLUCOME baratunganije ku muhingamo wo kuri uwu wa gatatu ikiganiro ku banyagihugu mu ntumbero yo gutanguza urugamba bise "Nutubwire iyo wakuye ubutunzi bwawe". Haheze nk’isaha imwe gusa, abaporisi benshi barongowe n’uwujejwe umutekano muri komine Rohero barahagaritse ico kiganiro kw’itegeko bavuga ko ryavuye hejuru.

Abanyagihugu isinzi bari bitavye akamo bari batewe n’ishirahamwe OLUCOME, mu kiganiro co gutanguza urugamba muri OLUCOME bise "Nutubwire iyo wakuye ubutunzi bwawe". Gabriel RUFYIRI yari yamenyesheje ko yamaze gutororokanya amazina, amazu n’ayandi matunga yo mu buryo budasiguritse (enrichissement illicite) afiswe n’abategetsi, akaba yari yemeye ko ashobora kuyashira ahabona mu ntumbero yo gusaba abo bategetsi ko bokwisigura mu nzego zibijejwe. Mu kibanza ico kiganiro cariko kiraberamwo muri EGO Hotel ku muhingamo wo kuri uwu wa gatatu, abanyagihugu batanguye bahanahana ivyiyumviro ku vyokorwa, mu ntumbero yo kurwanya ubukene bavuga ko bwugarije abanyagihugu, kandi hari akarwi k’abategetsi babandanya gutunga ibidasiguritse, bikaboneka ko hoba harimwo ugusesagura n’ukunyuruza amatunga y’igihugu, nk’uko bivugwa na Gabriel Rufyiri, umukuru w’ishirahamwe OLUCOME. Nk’isaha imwe gusa ikiganiro gitanguye, haciye hinjira umukuru w’igiporisi muri komine Rohero, asaba ko ico kiganiro cohagarikwa. Gabriel Rufyiri, umukuru w’ishirahamwe OLUCOME yamenyesheje iyo ntwazangabo ko bari bamenyesheje ko baza kugira ico kiganiro, asigura ko naho vyokenerwa ko agihagarika, bomuzanira urwandiko, ikiganiro gica kirabandanya.

Nta mwanya munini waheze, haciye haza abaporisi benshi cane, baherekejwe n’umukuru w’igiporisi mu gisagara ca Bujumbura, ari kumwe n’umwe mu bategetsi bo mu rwego rw’igendereza, ico kiganiro gica kirahagarara, abanyagihugu batahana agashavu biyumvira ingene mu ntwaro rusangi abanyagihugu bashobora kwankirwa gutunganya ikiganiro, kandi bari bakimenyesheje, aho tukabibutsa ko uko amategeko atunganya amanama avuga, ikiganiro barakimenyesha gusa, ariko ntibagisabira uruhusha, nk’uko benshi bakunda kuvyitiranya.

Hagumye amakenga ko Gabriel Rufyiri ashobora guhagarikwa n’igiporisi, kuko yagumye umwanya munini n’abo bategetsi bahagaritse ico kiganiro, biboneka ko bariko baramubaza ibibazo vyinshi. Muvyo twashoboye kubona, baramubajije insiguro y’igicapo cari ku mupira yari yambaye, ico naco kikaba cerekana umugabo inzara iri mu kwica, ariko agaburira uwundi mugabo avyibushe cane, kandi yambaye neza. Uwo mugabo yariko amugaburira yongera amubaza ati : "Amagorwa mfise azohera ryari?"

Vyatevye, Gabriel Rufyiri yahavuye yemererwa gutaha, ariko akavuga ko atangajwe n’ukubona abajejwe umutekano bahagarika ikiganiro yari yamamenyesheje inzego zose zibijejwe, gushika no ku mushikiranganji w’intwaro yo hagati mu gihugu. Ku bwiwe, akabona ko ari ingendo yo kudashaka ko ukuri ku bunyonyezi bukorwa mu gihugu kumenyekana.

Gabriel Rufyiri, arongoye ishirahamwe OLUCOME ( Observatoire de Lutte contre la Corruption et les Malversations Economiques)