Mombasa : Isakwa mu misigiti

Igiporisi co mu gihugu ca Kenya cagize isakwa mu misigiti ya Mombasa aho cari ciketse ko harimwo bamwe mu banywanyi ba al shebab bo mu gihugu ca Somaliya, umuntu umwe akaba yaciye agandagurwa n’ayo abandi bagera kuri 250 bakaba bafashwe mu masengesho yo mu gaturuturu.

Mu gihe bariko barasenga, abari mw’idini rya Islam bakaba bagiye bumva igiporisi kibahagaze hejuru mu gaturuturu buriko buraca mu misigiti ya Masjid Musa na Sakina iri hagati mu gisagara ca Mombasa, aho bariko barakekwa ko batunze ibirwanisho bitazwi. Umukuru w’igiporisi muri ako karere akaba yavuze ko bagize iryo sakwa kugira barabe ko amakuru yari amaze iminsi avugwa ko rumwe mu rwaruka rw’aho muri iyo misigiti ruriko rurategura igitero ari vyo.

Muri iryo sakwa, umwe mu basore akaba yishwe, mu gihe yashatse gutera igisasu ntezwaminwe abo baporisi. Muri abo bafashwe, abagera 251 bakaba bariko barabazwa, aho bakekwa kuba bari mu ntagondwa za al shebab.

Muri iryo sakwa rero mu giporisi bakaba bemeza ko bafashe amashoka, imipanga hamwe n’ibisasu ntezwaminwe.