Igisata c’ikawa cahawe imfashanyo na Banki y’isi yose

Inama nkuru y’uburongozi bw’ibanki y’isi yose yarashikirije imfashanyo y’imiliyoni 4,2 z’amadolare y’abanyamerika aje gushigikira ibungaburwa ry’isi n’iterambere ry’igisata c’ikawa mu ntara za Bubanza na Muyinga mu gihugu c’Uburundi.

Ibanki y’isi yose yashatse kwerekana ko ishigikiye Leta y’Uburundi mu bikorwa vyayo vyo guteza imbere isi n’ibidukikije, cane cane igiterwa c’ikawa.

Iyo mfashanyo yatanzwe n’ikigega c’isi yose kijejwe gukingira ibidukikije(FEM). Ico kigega kikaba gihurikiyemwo ibihugu bigera ku jana na mirongo umunani na bibiri n’amashirahamwe mpuzamakungu yaba ayigenga canke ayakukira ama Leta.