Igiteramo ca KINA MUSIC n’Abarundi carabonetsemwo ibitangaza

Igiteramo cabereye kuri Musée Vivant kuri uwu wa kane cagiye mu rutonde rw’ibiteramo vy’Abarundi bimaze kwitabwa n’abantu benshi kandi mu mutekano ntangere. Bimwe mu bitangaza n’uko hari abasuma benshi, hamwe n’umukobwa akora akazi katamenyerewe ku bakobwa mu Burundi. Uwahomvye ni uwasivye.

Igiteramo c’agakura cuguruwe na Rally Jo hamwe n’umurwi wiwe w’abahungu n’abakobwa batamba, aho yerekanye ko igiteramo yari yaciteguriye. Lolilo n’umugore wiwe hamwe n’abatamvyi biwe barabiciye biracika mu ndirimbo zitandukanye n’intambo zitwengeje, abaraho barashoboye gutwenga n’imbavu ziruma, Happy Famba akundwa cane kubera ukuntu atamba nawe ntiyavyoroheje, Black G nawe aravyunyura. Umwanya wari ukwiye ku baririmvyi kuko umwe wese yararirimba hagati y’indirimbo zitatu na zitanu.

Umukobwa karuharuhariwe mu kuryosha ibiteramo wo mu Rwanda (Anitha), afadikanije na Christian Nsavye, ntako batakoze kugira abantu bagumize ijisho ku ruhimbi abaririmvyi bariko baririmbirako. Abarundi n’abarundikazi barashimishijwe na Anitha kuko ata murundikazi barabona akora ubu "Master of Ceremonies"mu biteramo bikomeye nk’ico. Ico cabaye igitangaza ca mbere muri ico giteramo.

Abaririmvyi b’Abarundi bahejeje harabaye agacerere gatoyi aho abari mu nteguro z’igiteramo bacanacanako baja kwongereza umutekano w’umuduga waruzanye umurwi w’abaririmvyi bo muri KINA MUSIC. Christopher niwe yatanguye aho yatera isinzi ry’abantu ryashika nk’ibihumbi bitandatu bakitabira. Uwo yaratevye akura n’agahuzu asigara mw’ipantaro gusa, yakurikiwe na Dream Boyz (TMC na Platini) baryoheye cane abantu. Knowless ashitse hoho ibintu vyarunyutse. Abari aho vyaraboneka ko igiteramo cakozwe n’abaririmvyi bakunda cane kandi bazi cane mu ndirimbo zabo, batanguye ururirimbo gusa, hasigara haririmba abari aho bavanze Abarundi n’Abanyarwanda.

Mwomenya ko igiteramo carimwo abasuma batagira uko bangana, bigatuma aba "MC" basaba abantu baraho ko bokwiyubara kuko abasopa bari benshi. Ivyo vyaboneka aho abajejwe umutekano (securité) baguma bafata abo basuma.