Accueil > Imibano > Ikiganiro hagati y’abo vyega ku mategeko yo gusaba gutunga umwana (...)
Ikiganiro hagati y’abo vyega ku mategeko yo gusaba gutunga umwana utavyaye
mercredi 15 Rusama 2013
Ubushikiranganji bwo gufatana mu nda, agateka ka zina muntu n’ukudakumira bwaratunganije kuva ejo ikiganiro kizomara imisi ibiri hagati y’abajejwe kwubahiriza agateka ka zina muntu muri ubwo bushikiranganji hamwe n‘abakorera mu bisata vyo kuronderera abana imiryango ibarera.
![](IMG/jpg/dscn4187.jpg?1368626802)
Inyuma y’intambara, abana batari bake baracitse impfuvyi, abandi nabo batandukana n’abavyeyi babo kubera ubukene, bajana gutungirwa mu burerero, tutibagiye abatabwa bakiri inzoya.
Imiryango ibipfuza iraheza ikasaba kubahabwa ngo babarere, bacike nk’abana babo bwite, ivyo bita mu rurimi rw’igifaransa « Adoption ». Biraboneka rero ko mu Burundi, haba abatanga abo bana, haba abo baje kubasaba ko badakurikiza amategeko, rimwe na rimwe usanga nabo nyene batari bazi.
Nico catumye ubwo bushikiranganji butunganya ikiganiro hagati y’abo vyega kugira bahanahane ivyiyumviro ku mategeko no ku nzitizi boba bahora bahura navyo.
![](IMG/jpg/dscn4200.jpg?1368627619)
Ignace Ntawembarira, umuyobozi mu bushikiranganji bw’ugufatana mu nda, agateka ka zina muntu n’ukudakumira amenyesha ko uretse n’iyo miryango isaba gutunga abana nk’ababo, hari n’abarundi benshi kubera ukutamenya bashobora kutunga umwana kuva akiri muto, hagera ko atorana bakamwihakana kandi bari bamureze imyaka, bamuhata nk’uwabo.
![](IMG/jpg/dscn4198.jpg?1368627374)
Abakorera muri ico gisata barakenguruka cane ico kiganiro categuwe n’ubushikiranganji kuko nabo gaca kaba akaryo ko guhabwa umuco ku ntambamyi bahora bahura nazo muri uwo murimo wabo.
Sonia Brahim wo mw’ishirahamwe ADDIS GALICIA ryo mu gihugu ca Espagne risanzwe rifasha guhuza abana n’imiryango ibakeneye avuga ati: "Leta nize iradufasha kuko turondera ineza y’abana mu kubashikana mu miryango ibakeneye kandi ibakunda, tukabavana mu marerero y’impfuvyi no mw’ibarabara."
![](IMG/jpg/dscn4192.jpg?1368626911)
Egide Nduwimana