Ikigo Seruka catunganijwe amahiganwa ya Basketball

Ishirahamwe ry’umupira w’amaguru mu Burundi ryatunganije ihiganwa riza gutangura ku muhingamo wo kuri uno munsi kuwa kane ku kibuga ca Parquet, ihiganwa rihuza amakaminuza yo mu Burundi.

Ku rutonde rw’ingene bahava bahiganwa, Université Sagesse d’Afrique ihava ihura na Université Lumière de Bujumbura. Muri uwo mwanya nyene, Université Espoir d’Afrique izoba iriko ikina na Kaminuza ya gisirikare ISCAM. Abahava batsinda muri izo nkino z’uno munsi nibo bazoca bahura mu rukino rwa nyuma ruzoba ku munsi w’ejo kuwa gatanu igenekerezo rya 6 Nyakanga 2013.

Mu nkino z’umupira w’amaboko nyene "Basketball", harategekanijwe ku munsi wa gatandatu igenekerezo rya 7 Nyakanga 2013, inkino zo guhimbaza imyaka cumi ikigo Seruka kimaze cakira abafatwa ku nguvu.

Ku rutonde rw’ingene bazokina, ku ruhande rw’abigeme, kw’isaha umunani BERCO STAR izokina naLes COPINES ku kibuga co mu Gikungu. Umurwi LES GAZELLES ukaba urindiriye umurwi uzotsinda muri urwo rukino kugira ube ariwo bazoca bakina urukino rwa nyuma.

Ku ruhande rw’abagabo, kw’isaha icenda, URUNANI ruzokina na MUZINGA, hama kw’isaha icenda naho NEW STAR ikine na KERN ku kibuga co mu Gikungu. Urukino rwa nyuma ruzoca rukinwa bukeye ku munsi wa mungu igenekerezo rya 8 Myandagaro 2013 ku kibuga ca Département des sports.