Imiriyaridi 55,40 niwo mwimbu wa OBR muri Nzero

Imiriyaridi 55,40 z’amarundi nizo zatojwe n’ikigo OBR (Office Burundais des Recettes) muri kuno kwezi kurangiye kwa Nzero k’umwaka w’2015. Ku mwimbu wari utegekanijwe muri uko kwezi hakaba haburako umuriyaridi w’amarundi n’ibice mirongo itanu na bitandatu (1,56).

Nk’uko biri mw’itangazo ryasohowe n’ico kigo gitoza amakori n’amatagisi, ryateweko igikumu na Domisiyano Ndihokubwayo umukuru w’ico kigo, kuyo bari batoje mu kwezi kwa mbere mu mwaka uheze hakaba hiyongeyeko imiriyaridi 3,26 z’amarundi n’ukuvuga ibice 6,25 kw’ijana (6,25) kuko mu mwaka uheze mu kwezi kwa mbere bari batoje imiriyaridi 52,14.

Muri iryo tangazo kandi barerekana umwimbu wagiye utozwa muri ico kiringo nyene muri ino myaka itatu irangiye. Mu mwaka w’2012 hatojwe amafaranga agera ku miriyaridi 53,7, mu mwaka w’2013 hari hatojwe imiriyaridi 57,1 z’amarundi, mu mwaka w’2014 naho muri ico kiringo nyene hakaba hatojwe imiriyaridi 52,1.