Inama nshingamateka yemeje amasezerano arwanya ihohoterwa rya kiremwa muntu

Inama nshingamateka y’Uburundi yaremeje kwisunga ku munsi w’ejo kuwa gatatu itegeko ryubahiriza amasezerano akinga ihohoterwa rikorerwa kiremwa muntu.

Mu nyishu yatanze ariko yishura ku bibazo vy’abashingamateka, umushikiranganji w’intwaro yo hagati mu gihugu Edouard Nduwimana yamenyesheje ko impinyanyuro y’amategeko y’Uburundi yari ikenewe kugira batomore ku kurwanya ihohoterwa ryokorerwa kiremwa muntu.

Edouard Nduwimana, umushikiranganji w’intwaro yo hagati mu gihugu

Mu mashirahamwe adaharanira ivyicaro vya politike barashima iyemezwa ryo kwisunga ayo masezerano. Armel Niyongere, umukuru w’ishirahamwe rya gikirisu rirwanya ihohoterwa rya kiremwa muntu ACAT (Actions des Chrétiens pour l’Abolition de la Torture) amenyesha ko bakeza inama nshingamateka ku kubona yemeje kwisunga ayo masezerano azofasha mu kwubahiriza agateka ka zina muntu.

Ariko rero, umushingwamanza Armel Niyongere asaba abafata ingingo cane cane abategetsi ko bitoza biragarukira mu mvugo gusa, ahubwo ibihano ruhasha bize birahabwa abo bose bagiriwe n’ivyaha vy’ihohoterwa rya kiremwa muntu.

Armel Niyongere, umukuru wa ACAT

Kuri ayo masezerano yemejwe mu mwaka w’2002 mu gisagara ca New York, Uburundi nico gihugu ca mbere cemeje kwisunga ayo masezerano mu karere ka Afrika y’Ubuseruko.