Inama nshingamateka yemeje itegeko rishasha rigenga umurwi CNTB

Inama nshingamateka yatoye impinyanyuro nshasha y’itegeko rigenga umurwi utatura amatati y’amatongo nayandi matungo, CNTB (Commission Nationale Terres et autres Biens). Iryo tegeko rishasha rikaba ririmwo ishingwa rya sentare idasanzwe izoca imanza zijanye n’amatongo hamwe n’ayandi matungo.

Ingingo 45 ziri mw’itegeko ryari risanzwe rigenga umurwi w’igihugu ujejwe gutatura amatati y’amatongo nayandi matungo nizo ziriko zirirwa n’inama nshingamateka ngo zihinyanyurwe. Kuri uyu wa gatandatu igenekerezo 28 Kigarama 2013 aho hari haramutse hirwa iyo mpinyanyuro, umurwi w’abashingamateka bakomoka mu mugambwe UPRONA bakaba babanje gutaramuka kugira babonane. Inyuma yuwo mubonano, umushingamateka Bonaventure Gasutwa akaba yaciye ashikiriza ibibazo vyofatirwako muri iryo hinyanyurwa. Ivyo rero bakaba batabibemereye maze abo bashingamateka bo muri UPRONA bakaba baciye bafata ingingo yo kwiyonjorora muri ivyo bikorwa.

Iyo mpinyanyiro y’itegeko rigenga umurwi CNTB yatowe ikaba ihaye ububasha uwo murwi ubushobozi bwo kugira sentare idasanzwe ica imanza z’amatongo n’ayandi matungo. Bisigura ko uwo murwi wa CNTB uzoca urubanza kandi ingingo yiyo sentare ikaba izoba ari ntayegayezwa. Uwudashimye urubanza uwo murwi uzoba waciye, azoba afise uburenganzira bwo kwungururiza muri iyo sentare idasanzwe ya CNTB. Ntayindi sentare izoshobora kungururizwamwo urubanza rwaciwe n’iyo sentare.

Abashingamateka bo muri UPRONA bakaba bavuga ko hahonyanzwe ingingo y’205 yo mw’ibwirizwa nshingiro mu gace kayo ka 3, hamwe n’iya 36, ingingo zijanye nuko abantu barekuriwe kuburana.