Indege ya Algeriya yaburiwe irengero muri Sahara

Abantu barenga 116 bari mu ndege ya Algeriya yazimiye ntibaratorerwa irengero, muri abo bazimiye, abagera kuri 50 bafise ubwenegihugu bw’Ubufaransa.

Reta y’Ubufaransa ivuga ko iyo ndege yazimanganye mu gatondo ka kare igeze hejuru y’uburaruko bwa Mali.
Nk’uko bivugwa n’abashakashatsi, ikirere iyo ndege iriko iraronderwamwo kiri hagati y’akarere ka Gao mu buraruko bushira ubuseruko na Tessalit mu buraruko.

Ako karere iyo ndege iriko iraronderwamwo kari kamaze umunsi wose kavugwa ko kerekana ibimenyetso vy’ikirere kitameze neza.

Mu gihe bivugwa ko iyo ndege yoba yazimanganiye hejuru y’uburaruko bwa Mali, ico gihugu kikaba kirangwamwo imirwi yishimikiza amategeko ya Islamu n’iyindi mirwi, abategetsi b’Ubufaransa bamenyesha ko badakeka ko iyo ndege yoba yarakorowe.