Ubufaransa : Ahakorera inama nshingamateka hasutswe umwanda

Ingoro ikoreramwo inama nshingamateka y’igihugu c’Ubufaransa yazindutse yugarijwe n’ikirundo c’umwavu.

Ivyo vyabaye mu gitondo co ku munsi wa kane w’igenekerezo rya 16 Nzero, aho basanga imbere y’ingoro y’Inama nshingamateka y’Ubufaransa hari ikirundo kinini c’umwavu unuka cane. Imodoka yasutse uwo mwavu w’ubwoko bwose, yari yanditseko uku : "Hollande n’abo mukorana poritike, hanze!"

Amakuru duhabwa n’ikinyamakuru Reuters amenyesha ko umudereva w’iyo modoka yahavuye afatwa nk’igihe c’isaha zitanu «11h00» aca agenda gusambishwa.

Mu gihe ivyo vyariko biraba, umuhora ntangazamakuru w’Ubufaransa AFP waciye uronka ubutumwa «mail» bumenyesha ko uwo mugabo yagomvye kwerekana agashavu afise, kugira umukuru w’igihugu c’Ubufaransa François Hollande azokwame yibuka ko intwaro yiwe hari abo itanezereza."

Ayo makuru nyene abandanya amenyesha ko François Hollande yatowe mu mugambwe w’aba «Socialiste» asanzwe adakundwa kandi ko kenshi bakunda kumuvugako vyinshi vyo mu buzima bwiwe. Aho ni mu gihe baherutse kumwagiriza ko yarenze ibigo, bikaba bivugwa ko n’umupfasoni wiwe yoba ari mu bitaro kubera intuntu y’ibivugwa ku mugabo wiwe.