Ubushikiranganji bw’indero burashima ivyo bumaze kurangura

Inama yo kwihweza ivyaranguwe mu bushikiranganji bubiri bujejwe indero yahuje abakozi bakuru bo mu bushikiranganji bw’indero, hamwe n’abasanzwe bakorana n’ubwo bushikiranganji, kuri uwu wa kabiri. Intumbero yari uguhanahana ivyiyumviro, mu guteza imbere inyigisho.

Iyo nama yari iyo kurabira hamwe ivyaranguwe muvyari vyarategekanijwe gukorwa mu mwaka w’2013-2014, mu nteguro zikurikira : ukurwiza amashure, kugabanya ibitigiri vy’abanyeshure bahitira, gushiraho igisata ca 4 c’inyigisho z’ishure shingiro (enseignement fondamental), guteza imbere inyigisho z’imyuga, hamwe n’ibijanye n’ihinduka muvyerekeye impapuro z’umutsindo zitangwa na kaminuza nk’uko vyashikirijwe n’umunyamabanga ntayegayezwa mu bushikiranganji bw’inyigisho z’amashure y’intango n’ayisumbuye.

Nk’uko yabishikirije, ibitari bike vyararanguwe, aha akavuga nko kugwiza amashure biciye ku barongoy amakomine bafadikanije n’ubuyobozi bw’indero mu ntara berekanye uturere dukenye amashure gusumba utundi, kuko aribo basanzwe bahamenyereye. Ku vyerekeye kugabanya igitigiri c’abanyeshure bahitira, uwo munyamabanga yamenyesheje ko intambwe yatewe ari ndende kuva mu mwaka uheze.