“Integuro y’itegeko rigiye kugenga abamenyeshamakuru ntiyubahiriza Demokarasi”

Inyuma y’aho inama nshingamateka yemereje integuro y’itegeko rigenga umwuga w’ukumenyesha amakuru, risubirira itegeko ryo muri Munyonyo 2003, umubabaro ni wose muri uwo muryango.

Innocent Muhozi, umukuru w’urwego rugenzura itangazamakuru mu Burundi, abamenyeshamakuru ntibarota bavuga aho bakura amakuru batangaza kuko ku bwiwe, ivyo bitandukanye n’ibwirizwa shingiro ritanga ubwigenge ku bamenyeshamakuru iyo bariko barangura umwuga wabo.

Ku kibazo c’amande azotangwa n’abazoba barenze amategeko, Innocent Muhozi avuga ko ari umurengera( gushika ku miliyoni umunani z’amafaranga y’amarundi). Amenyesha ko ivyo bisa n’intumbero yo gushaka ko hari abazokwugara kuko atari bose bazoshobora kuronka ayo mafaranga.

Mu runani rw’abamenyeshamakuru, bizeye ko inama nkenguzamateka izotosora iyo nteguro y’itegeko, igakuramwo utunenge twose turimwo. Ivyo bishikirizwa na Alexandre Niyungeko umukuru w’urwo runani.

Tubibutse iyo nteguro yemejwe n’abashingamateka igenekerezo rya 03 Ndamukiza 2013, bikaba vyitezwe ko abakenguzamateka baryemeza nabo imbere y’uko umukuru w’igihugu aterako igikumu