Inyuma y’imyaka 39 y’agasho yaciriwe urubanza rwo gupfa, yarekuwe

Muri Reta Zunze Ubumwe z’Amerika hari umugabo yaraye arekuwe kandi yari yaciriwe urubanza rwo gupfa. Uwamwagirije yagarutse aramukurako icaha.

Ricky Jackson yarekuwe

Ricky Jackson yafashwe mu mwaka w’1975 yagirizwa kwica arashe umutozakori agaca amuta muri "Acide". Ahejeje kwagirizwa n’umwana w’12 yemeza ko yamubonye ariko akora icaha, yaciriwe igihano co gupfa. Inyuma y’imyaka 39 mu munyororo, umwe yamwagiriza ubu afise imyaka 50 yasohoye igitabo aho yavuga ko yabeshe, ko atiyigeze abona ibijanye n’ubwo bwicanyi bwagirijwe Ricky Jackson.

Umuyobozi ajejwe gutanga amakuru mu biro vy’umushikirizamanza CUYAHOGA, yavuze ko ibirego vyose bimuvuyeko, ati : "Ricky aronse umwidengevyo". Ricky yasohotse ibohero mu gatondo ko kuri uyu wa gatanu i Cleverland mu ntara ya Ohio.

Ayandi makuru avuga ko kuva mu mwaka w’1973, hamaze kwezwa abanyororo 148 bari baciriwe urwo gupfa. Ricky abaye uwa gatanu mu mwaka w’2014