Inzara iri mu gihugu yerekanwa n’umurindi w’iduga ry’ibiciro

Umurindi w’iduga ry’ibiciro ku bifungurwa ku masoko, urerekana ko mu Burundi hari inzara, vyashikirijwe na Gabriel Rufyiri arongoye ishirahamwe OLUCOME kw’izina ry’amashirahamwe 477 yiyemeje kurwanya ubuzima buzimvye.

Icigwa cakozwe mu ntara zitanu z’igihugu hagati y’ukwezi kwa Ndamukiza na Rusama, cerekana ko ibiciro vy’ibidandazwa vya nkenerwa vyaduze cane ku bice 50 kw’ijana harimwo igitoro ca essence n’i ciment nk’uko bishikirizwa na Gabriel Rufyiri mu kiganiro n’abanditsi n’abamenyeshamakuru. Ico cigwa cakozwe ahanini ku mfungurwa nk’umuceri, ibiraya, ibitunguru umuceri mu ntara za Ngozi ,Cibitoke , Gitega kayanza na Bujumbura Mairie. Gabriel Rufyiri aremera ko hari utwigoro twagiye dukorwa na Reta ,ariko rero amenyesha ko ubutunzi bw’igihugu butigeze bwisununura.

Mu mashirahamwe yishinze kurwanya ubuzima buzimvye basaba itunganywa ry’inama rukokoma yerekeye ubutunzi. Reta kandi yokurako amatagisi ku bidandazwa bimwe bimwe vya nkenerwa nk’uko yigeze kubikora mu gihe hibonekeza inzara.