Ishavu niryo ryabatumye bashira igikiriza cabo hejuru

Kuva aho abasanzwe badandaza ibitenge mw’isoko yo kwa Siyoni bugariwe n’ikigo OBR bagirizwa ko binjiza ivyo bitenge mu Burundi ata matagisi barishe, n’ubu ivyo bibanza birugawe, abo badandaza bakaba bidoga ko inzara igiye kubica kuko bamaze igihe batariko baradandaza, bagasaba Leta ko ivyo bibanza vyokwugururwa, kuko amabanki basavye ingurane bayariha ku munsi ku munsi.

Bamwe muri abo bahora badandariza ibitenge muri ivyo bibanza, tukaba twabasanze bariko barakina amakarata, abandi nabo bicurikiriye, ubona ko bababaye. Abo bose bakaba basavye ko naho bugariwe ko atamatagisi y’ibidandazwa vyabo bariha, nyabuna abapolisi hamwe n’abakozi b’ikigo OBR bofatwa, bakabazwa kuko ivyo bitenge aribo babizana.

Ku kibazo c’uko abakenyezi badandariza mw’isoko kwa Siyoni biyambuye impuzu maze bagatuka n’abapolisi, umwe muri abo bakenyezi twahasanze akaba yatumenyesheje ko rirya ryari ishavu, kuko bamwe muri bo bahishije ivyo badandaza mw’isoko nkuru ya Bujumbura kuwa 27 Nzero uyu mwaka, mu gihe ubu naho bari bumvise ko bagire batwarwe ibintu bariko baradandaza, kandi mu kubironka barinze gusaba amadeni amabanki, ivyo ari navyo vyatumye abo banyagihugu batwarwa n’agashavu bumva bokwambura impuzu zabo bakazita.

Muri iki gihe abo badandaza bakaba batagira ayo bacira nayo bamira, kuko ikigoyi arico kigiye kuzobomora. Ariko rero, bakaba barindiriye ikizova mu nama izoba ejo, iyo nayo bikavugwa ko izobahuza n’amashirahamwe ataho yegamiye muvya politike.