Ishure shingiro rigiye gutangura

Ntagisivya, amashure mato mato agiye kuzohora agarukira mu mwaka w’icenda, bimwe bita ecole fondamentale. Ivyo biri mu vyo umushikiranganji Rose Gahiru agiye kwihutira gushira mu ngiro.

Kuva kuri uyu wa 14 gushika kuwa 15 Ruhuhuma, ubushikiranganji bw’amashure mato, ayisumbuye, no kwigisha gusoma no kwandika, buriko buratunganya ibikenewe, kugira kuva mu mwaka w’ishure uza, amashure mato azohore agera mu mwaka w’icenda.

Umushikiranganji Rose Gahiru ari na we yatanguje ivyo bikorwa , amenyesha ko ashimishwa n’aho imyiteguro igeze. Asaba ko ibikenewe vyotegekanywa hakiri kare, kugira hatangure vuba inyigisho z’abazigisha.