Ishuri Burundi American International Academy rizotanga inyigisho zisa n’izo muri Amerika

Icegera ca kabiri c’umukuru w’igihugu Gervais Rufyikiri yaruguruye icese ishuri rigizwe n’amashuri mato mato n’ayisumbuye. Ishuri yubatswe n’ishirahamwe Aboundant Life Institute Burundi. Iryo shuri rigiye kuzoshimikira ku nyigisho zijanye n’ubuhinga (Science), ubuhinga bwa none (technologie), ibijanye n’inyubako ( Ingenieurie) hamwe n’ivy’ibiharuro (mathematique).

Ishuri Burundi- American International Academy( BAIA) rwaruguruwe kuri uwu wa kabiri na Gervais Rufykiri, icegera ca kabiri c’umukuru w’igihugu. Ryubatswe mu nzu y’igorofa zitatu mu buhinga buhanitse, bisunga ico bazohigishiriza. Rizokwakira abana bato cane biga mu mashuri bita "Maternelle", abo bana bakazobatora mu mihana iwabo, bazogaburira, bongere babafashe vyose gushika basubire iwabo. Si abo gusa, eka n’abazokwiga mu mashuri yisumbuye barahise ikibanza. Abana bazokwiga kuri iryo shuri bazoronswa inyigisho zisa n’izitangwa mu mashuri yo muri Reta Zunze Ubumwe za Amerika. Muri ivyo harimwo ivyigwa bijanye n’ubuhinga (Science), ubuhinga bwa none (technologie), ibijanye n’inyubako (Ingenieurie) hamwe n’ivy’ibiharuro (mathematique).

Mw’ijambo ryiwe ryo kwugurura icese iryo shuri, Gervais Rufyikiri ashikiriza ko ashima intambwe Uburundi bugezeko mu guteza imbere ibijanye no kwitaho inyigisho. Avuga ko ishuri Burundi-American International Academy( BAIA) rije ryiyongera ku yandi mashuri mpuzamakungu nka Ecole Belge, Ecole Française, n’ayandi. Kubw’ivyo, Gervais Rufyikiri ahamagarira abagwizatunga bo mu Burundi no mu mahanga gushira imitahe yabo mu bijanye n’amashuri kuko iruhande y’inyigisho z’akamaro, ico gisata kirinjiza n’amahera. Nk’uko iryo shuri ritegekanya kuzohora ritanga impapuro z’abana ba ntahonikora bazoja kwiga muri Reta Zunze Ubumwe za Amerika, Gervais Rufyikiri arashimira ishirahamwe Aboundant Life Institute Burundi ku ciyumviro ciza nk’ico bagize.

Gervais Rufyikiri ariko ashikiriza ijambo

Mwomenya ko ibirori vyo kwugurura iryo shuri vyatewe iteka n’abategetsi batari bake harimwo abarongoye amashengero aha mu Burundi, icegera c’umukuru w’igihugu ca Congo iharanira intwaro rusangi, hamwe umushikirangi w’inyigisho z’amashuri mato mato nay’isumbuye.