Israël : Ibirori vyo gusezera Ariel Sharon vyatanguye

Inyuma y’urupfu rwa Ariel Sharon, yasezeye isi ku myaka 85, akama yari amaze imyaka umunani muri "Coma", Reta ya Israël n’umuryango w’uwo yahora ari umushikiranganji wa mbere wa Israël batanguye kwitegurira ibirori vyo kumusezera ubwa nyuma, hamwe n’ukumushingurana iteka.

Ariel Sharon yitavye Imana ku myaka 85

Muri iyo myiteguro, umukuru w’igihugu ca Israël Shimon Peres, n’umushikiranganji wa mbere Benyamin Netanyahu barishikiye ku munsi w’ejo kuwa gatandatu kwunamira iyo "ntwari idasanzwe, yamanye ubwira n’umutima rugabo", nk’uko vyivugiwe n’umukuru w’igihugu Shimon Peres.
Shimon Peres ati : « Ariel Sharon ntiyabazwa ubwoba mu bikorwa vyiwe. Twaragiranye ubugenzi bukomeye ku gatwe kacu, n’ukuri yari intwari ibushitse. Nzokwama ndamwibuka n’aho isi yavuyemwo imusubiyeko».
Umukuru w’igihugu Shimon Peres yarakeje ubukerebutsi bw’iyo ntwari y’umusirikare wa kera, umunyeporitike yamye ashira imbere inyungu z’igihugu ciwe, atibagiye kugikingira.

Shimon Peres, umukuru w’igihugu ca Israël

Kuva ku bitaro vyegereye igisagara ca Tel-Aviv, ari naho yasandabiye inyuma y’imyaka umunani ari muri "Coma", ikiziga ca Ariel Sharon kizokwungururizwa i Yeruzaremu. Bitegekanijwe ko isandugu azoba arimwo yerekanwa kuri uwu w’Imana, abashaka kumwunamira bashobore kumusezera.

Ku munsi w’ejo kuwa mbere, ibirori nyezina vyo kumusezera bizobera mu ngoro y’inama nshingamateka. Abategetsi batandukanye bazoba baje bava kw’isi nzima bazokwishikira kumusezera irya nyuma, aho twobabwira nka Joe Biden, icegera c’umukuru w’igihugu ca Reta zunze ubumwe za Amerika, Serguei Lavrov, umushikiranganji w’imigenderanire y’Uburusiya n’ayandi makungu, hamwe na Tony Blair yahoze ari umushikiranganji wa mbere w’igihugu c’Ubwongereza. Bahejeje kumusezera, Ariel Sharon azoca ashingurwa ku muhingamo wo ku munsi w’ejo kuwa mbere igenekerezo rya 13 Nzero 2013.