Isuku rirakenewe mu gisagara ca Bujumbura

Abarongoye inzego n’abajejwe ivy’isuku ngaha mu gisagara ca Bujumbura hamwe n’abafasha mu kugwanya ikiza korera barakoraniye hamwe kuri uyu wa kabiri,igenekerezo rya 23 Ndamukiza 2013,kugira batorere hamwe umuti w’ico kiza Korera cagisibije ngaha mu gisagara.

Icirwa cakozwe uno mwaka hano mu gisagara ca Bujumbura,cerakana yuko hagikenewe kugirwa isuku ryinshi hano mu gisagara.Saidi Juma,umukuru w’igisagara ca Bujumbura, yamenyesheje ko uburyo bushasha bwari bwarashinzwe, bwo kurihisha abafise umwavu, bwahagaritwe kubera ko Mairie itagishoboye gukura imicafu yose yo mu gisagara ca Bujumbura.

Agasaba abajejewe intwaro,gukurikiranira hafi amaserano yashizweko igikumu hagati y’amashirahamwe ajejwe kutwara imyavu mu ngo z’abantu n’ingo zifise iyo myavu,kugira ngo ivyo bikorwa bigende neza nk’uko vyategerezwa gukorwa.

Saidi Juma yamenyesheje kandi ko ikigo kijejewe ivy’isuku,kigiye gushirwaho kugira bacungere isuku m’uburiro n’ubunywero mu kugira isuku,abatayigize nabo,bazofatirwa ibihano vyo kwugarirwa imirimo yabo haba muri ubwo buriro canke muri ubwo bunywero.