James Rodriguez abarizwa muri Real Madrid

Umurwi w’umupira w’amaguru wo muri Espagne, Real Madrid waguze umwe mu bakinyi ba mbere bakomeye kandi bigenjeje neza mu nkino za nyuma z’igikombe c’isi yose caheruka kubera mu gihugu ca Bresil. James Rodriguez akinira umurwi nserukiragihugu wa Colombiya agiye kubarizwa mu murwi wa Real Madrid.

James Rodriguez yahora akinira umurwi wa AS Monaco wo mu gihugu c’Ubufaransa, akaba yaguzwe na Real Madrid, ku kiguzi kitaramenyekana. James Rodriguez niwe mukinyi yinjije ibitsindo vyinshi mu nkino za nyuma z’igikombe c’isi yose zabereye muri Brezil.

N’aho ikiguzi ca James Rodriguez kitaramenyekana, mw’itangazo umurwi wa AS Monaco wasohoye, wamenyesheje ko ivyo Real Madrid yagiriye AS Monaco ari amwe mu masezerano akomeye abaye mu mupira w’amaguru.

Mu kurindira kumenya ico kiguzi, hari amakuru avuga ko James Rodriguez agiye kuba umukinyi wa kane azimvye kw’isi yose, inyuma ya Gareth Bale, Cristiano Ronaldo na Luis Suarez.