"Juvent NDUWIMANA yoronswa umushingwamanza"

Petero Karaveri Mbonimpa, umukuru w’ishirahamwe APRODH ashikiriza amakenga yiwe, kw’irementanya ryoba ririko rirategurwa kugira ahindure ivyo yashikirije, abishire kuri bamwe mubaharanira agateka ka zina muntu, ko bari mubishe barya babikira.
Uwo arongoye APRODH, asaba ko Juvent NDUWIMANA yaronswa umushingwamanza amufasha kuburana.

Umukuru wa APRODH, Petero Karaveri Mbonimpa, amenyesha ko iryo rementanya ry’uguhinduza Juvent NDUWIMANA ivyo yiyemereye, ryatanguye gukorwa agishikanwa i Bujumbura, akuwe muri Somaliya mu bikorwa vya AMISOM. Kuva mw’ijoro ryo kuwa gatanu, Juvent NDUWIMANA yavanwe mu gasho k’igendereza atwarwa muri sentare isubiramwo imanza ya Bujumbura.
Petero Karaveri Mbonimpa amenyesha ko uwo Juvent NDUWIMANA yaciye atangura kugenderwa na bamwe mubo yagirije ubwo bwicanyi, akavuga nk’uwo batazira "Kazungu" yagiyeyo, hamwe n’uwundi muporisikazi yagiyeyo kuri uwu wa mbere, bose bakaba bajanwa n’ukumbwira Juvent NDUWIMANA ko yohindura ivyo yashikirije, akavuga ko ari irementanya yakorewe, agaheza akavuga ko bamubesheye, nabo bakamufasha guhindura imyidondoro yiwe.

Petero Karaveri MBONIMPA, arongoye ishirahamwe APRODH

Nk’uko bishikirizwa na Petero Karaveri Mbonimpa arongoye APRODH, Biratangaje ingene Juvent NDUWIMANA yojanwa kubarizwa muri parake ya sentare isubiramwo imanza ya Bujumbura, kandi urubanza rwiwe rukiri muri parake ya sentare nkuru y’igihugu muri Mairie ya Bujumbura, kuko naho abavuzwe vyokenerwa ko bumvirizwa, bokwitaba muri sentare nkuru y’igihugu ku mushikirizamanza kizigenza wa Repuburika.
Petero Karaveri Mbonimpa agatangazwa n’ukungene amatohoza akorwa ijoro, agakorwa kandi na bamwe mu bavugwa muri ubwo bwicanyi. Muri APRODH basaba ko Juvent Nduwimana yoronswa umushingwamanza.

Tubibutse ko inyuma y’umuporisi azwi kw’izina rya "Mwalabu" yaheruka kwiyemerera ko ari mubishe ba babikira b’Abatariyanokazi, Juvent Nduwimana yagize kabiri yiyemereye ko yakoreshejwe muri ubwo bwicanyi nyene bwakorerwa Ababikira batatu b’Abatariyanokazi ko kuri Paruwasi Guido Maria Conforti mu Kamenge.

Juvent NDUWIMANA avuka muri TEZA mu Kamenge, nk’uko avyivugira, amenyesha ko we n’umuporisi "Mwalabu" batanguye kubatumako mu ntango z’ukwezi burya bwicanyi bwabereyemwo, akaba yitavye Major Joseph Niyonzima batazira "Kazungu", bajana ari babiri n’uwo "Mwalabu" kuko ari nawe yamubwiye ko bamutumyeko, ko hari ico bamukenereye.
Bompi basanze Major Joseph Niyonzima batazira "Kazungu" aho yariko arubakisha inzu, inyuma ya Sokariti, bavugana ari batatu gusa, ababwira ko mu masaha aza kuza, ahava abarondera, ariko ntibabwirwa igikorwa bahava bahabwa. Bagumanye amakenga, ariko umwe muribo (Mwalabu) akaba yari yamaze kubwirwa na "Kazungu" ko ivyo bashaka gutumwa bifitaniye isano n’ababikira b’abazungukazi boba bafise ivyo bazi mu bikorerwa muri Congo.

Juvent NDUWIMANA

Juvent Nduwimana amenyesha ko inama ya mbere ya bose yabaye igenekerezo rya 6 Nyakanga 2014, ikaba yabereye mu bunywero "Iwabo w’abantu" bwa Général Adolphe Nshimirimana yahoze arongoye urwego rw’igendereza, nawe nyene yari muri iyo nama. Abandi bari bayitavye akaba ari Guillaume Harushimana ajejwe ubutunzi mu kigo Centre Jeunes Kamenge, umuporisi Ayubu, hamwe n’umuzungu azwi kw’izina rya Claudio Marano yahora arongoye ikigo Centre Jeunes Kamenge, ariko Juvent Nduwimana akemeza ko Claudio Marano atamaze umwanya munini muri iyo nama.

Juvent NDUWIMANA amenyesha ko iyo nama yabaye we na "Mwalabu" bari ukwa bonyene ku ruhande, mu nyuma "Kazungu" ari kumwe na Guillaume Harushimana baca barabahamagara bababwira ko igikorwa bagira bahabwe ari ico kugandagura ababikira Lucia, Olga na Bernadetta.

Imbere y’uko ubwo bwicanyi bw’abo babikira batatu b’Abatariyanokazi buba, Juvent NDUWIMANA amenyesha ko yamye akoreshwa mu bindi bikorwa yita ama "Missions", nk’iyo hari nk’ibikorwa vy’ubwicanyi bakaba bamwikorako. Mu bakunda kumutumako bamuha ivyo bikorwa akavuga Général Adolphe Nshimirimana, hamwe na Général Ndirakobuca Gervais batazira "Ndakugarika".