Karusi : Umukuru w’umugambwe SAHWANYA FRODEBU akwije iminsi ine mw’ibohero

Umukuru w’umugambwe SAHWANYA FRODEBU mu ntara ya Karusi apfungiwe mu gasho k’igiporisi mu ntara ya Karusi kuva ku munsi wa gatandatu. Ubutungane bwamvumvirije kuri uwu wa kabiri, ariko akaba yaciye asubizwa mw’ibohero.

Séverin Ntirugayimvo, umukuru w’umugambwe SAHWANYA FRODEBU mu ntara ya Karusi yumvirijwe n’umushikirizamanza w’iyo ntara, inyuma y’iminsi ine yari amaze ari mw’ibohero, yagirizwa gutyoza Musitanteri wa komine Nyabikere iri mu ntara ya Karusi nyene, hamwe n’uguhungabanya umutekano w’igihugu.

N’aho uwo mukuru w’umugambwe yagirizwa gutyoza Musitanteri hamwe n’ugushaka guhungabanya umutekano w’igihugu, ayandi makuru ava muri iyo ntara avuga ko yoba ariko azira ko yashize ahabona ubunyonyezi n’ugusesagura amatunga ya Komine kwoba kwakozwe na Léonidas Nakumuryango, Musitanteri wa komine Nyabikere.