Kenya : Abajejwe umutekano bikeka ibitero vy’abihevyi mu nkino z’igikombe c’isi yose

Abategetsi ba Kenya bafashe ingingo yo kwongereza umutekano muri kino gihe c’inkino z’igikombe c’isi yose, mu ntumbero yo gukingira abakunzi b’umupira w’amaguru baba bari mu bibanza bitandukanye.

Umugenduzi mukuru mu gipolisi ca Kenya, David Kimaiyo yamenyesheje ko ibitero biheruka mu bisagara vya Nairobi muri Kenya, Mombassa hamwe n’ibitero biheruka kuba mu gihugu ca Ouganda, vyose hamwe vyari bigamije gutera abakunzi b’umupira w’amaguru baba bakoraniye hamwe. Yasavye abategesti bo ngaho muri Kenya kwongereza umutekano w’igihugu.
"Igipolisi gishaka kumenyesha abanyagihugu ko twashizeho ingingo zose zishoboka, mu gukingira umutekano, kugira ngo abazoba bariko baraba izo nkino mu bibanza bitandukanye, yaba mu bunywero canke ibindi bibanza, bazorabe mu mutekano ntangere."

Ariko rero, mu gipolisi basavye abantu bose bafise mwene za nyubakwa zihuriramwo abantu benshi baje kwidagadura ko boraba neza ko bashizeho ingingo zishoboka mu gucungera umutekano kugira umuntu wese mu kwinjira abanze gusakwa neza. Umukuru w’igipolisi yahamagariye abanyagihugu kurikanura nabo nyene bagateramira umutekano wabo, mu kwirinda kunywa inzoga nyinshi.