Kenya : Abantu indwi bagandaguwe na el shabab

Intagondwa z’umuhari wa el shabab zasubiye kwemanga igitero zagize ku muduga wari utwaye ingenzi mu gihugu ca Kenya, aho abantu bagera ku ndwi bitavye Imana.

Abantu bitwaje ibirwanisho kandi bambaye impuzu za gisirikare, akaba aribo bateye iyo modokari babanje kuyirasa i Witu hafi y’igisagara ca Mombasa. Aho hantu izo ntagondwa zitwaza amategeko akaze y’idi rya Islam barasiye abo banyagihugu, akaba ari nko ku birometero ijana vy’urubibe Kenya ihana n’igihugu ca Somaliya. Akogace rero kaba koba ubu karimwo imirwi y’abarwanyi bitwaza inkoho, kandi bo mu muhari wa el shabab.

Kugeza ubu, igihugu ca Kenya kikaba kiriko kirasohora abasirikare benshi baja muri ako gace, kugira bashobore gutuza iyo mirwi iguma itera abanyagihugu. Igihugu ca Kenya kikaba kimaze iminsi cabaye ikirimbiro ry’abo barwanyi, aho izo nkozi z’ikibi zagiriza ico gihugu kuba cagiye gufashanya n’ibindi bihugu vyo muri Afrika, gutuza abarwanyi ba el shabab mu gihugu ca Somaliya.