Kenya : Ibimenyetso bihari vyerekana ko hari abayoboke batari bake ba Al shabaab

Inyuma y’aho umurwi w’iterabwoba Al Shabaab ukoze igitero kuri kaminuza y’i Garissa muri Kenya, hari ibimenyetso vyerekana ko uwo murwi woba ufise abayoboke batari bake aho mu gihugu ca Kenya.

Hari urwaruka rwinshi rwo mu gisagara ca Isiolo, kiri hagati mu gihugu ca Kenya rwaburiwe irengero, bikavugwa ko ruja guhamagara ku materefone imiryango yabo bababwira ko binjiye mu murwi Al shabab.

Amakuru nayo ava mu nzego zishinzwe umutekano avuga ko ibiganiro vyo kuri ngendanwa zumvirije vyerekanye ko abari inyuma y’igitero giherutse gukorwa kuri kaminuza ya Garissa muri kuno kwezi bari bafise abantu batari bake bakorana muri Kenya. Ariko umunya Kenya umwe gusa niwe amaze kumenyekana ko yari mu bagabo bane bitwaje ibigwanisho bateye iyo kaminuza.

Tubibutse ko igitero c’i Garissa cahitanye abantu ijana na mirongo ine n’indwi.