Kenya: Igipolisi kiriko kirondera bane bagirizwa iterabwoba

Abajejwe umutekano mu gihugu ca Kenya bari mu gikorwa co gusaka barondera abikekwa gukora ibikorwa vy’iterabwoba,babaciye mu ryahumye igihe bariko basaka inzu imwe mu gisagara ca Mombasa.

Muri ico gikorwa co gusaka cabaye kuwa mbere igenekerezo rya 4 Nzero 2015,igipolisi cafashe inkoho zibiri n’ibintu biturika inyuma yo gusaka muri iyo nzu yahora ikoreramwo n’abo bantu bane.

Umukuru w’igipolisi mu gisagara ca Mombasa, Nelson Marwa avuga ko inkoho imwe muri izo zafashwe yakoreshejwe mu kwica umupolisi umwe muri ico gisagara mu mwaka uheze.

Iyindi nkoho yo mu bwoko bwa M4, yarakoreshejwe mu gitero co kw’ikambi ya gisirikare mu gisagara ca Mombasa mu mpera z’ukwezi kwa cumi na rimwe.

Igipolisi cerekanye amafoto y’abo baronderwa bane, bavuga ko ari bamwe bo mu mugwi w’abarwanyi ba El Shabab binyegeje mw’ishamba rya Boni, ku birometero 500 mu buraruko bwa Mombasa.