Kidumu na Kitoko mu giteramo kidasanzwe i Bujumbura

Ishirahamwe BRARUDI ryasohoye urupapuro rutangaza igenekerezo ry’umunsi mukuru wahariwe ikinyobwa ca Amstel. Haba ku ruhande rw’abaririmvyi no ku binyobwa, haraboneka ivyahindutse.

Umuririmvyi Kidum atari aherutse kuboneka mu biteramo vyo mu Burundi yatowe kuzoteramisha abantu mu giteramo "Amstel Beer Fest" categuriwe ikinyobwa ca Amstel. Azoba ari kumwe n’umuririmvyi Kitoko wo mu gihugu c’Urwanda. Ikiboneka ku rupapuro ntangazagiteramo, kwinjira azoba ari amahera ibihumbi cumi vy’amarundi, uwinjiye akazohabwa ibinyobwa bibiri n’ico kurya. Tugereranije no mu mwaka uheze dusanga kwinjira atacahindutse ariko ibinyobwa vyaragabanutse, bigaburwamwo kubiri. Bisigura ko uwuzoba ari mu giteramo azoba arekuriwe ibinyobwa 2 n’ico kurya.

Ku ncuro ya kabiri y’igiteramo citiriwe ikinyobwa ca Amstel "Amstel Beer Fest", ikibanza nticahindutse ni "Cercle Helenique", azoba ari kw’igenekerezo rya 10 Gitugutu kuva igihe c’isaha cumi na zibiri z’umugoroba, gushika isaha zitatu z’ijoro (De 18h à 21h).

Tubibutse ko ku ncuro ya mbere bamwe mu bamenyeshamakuru bakumiriwe kwinjira ata nsiguro ihagijje itanzwe, zimwe mu nsiguro zatangwa n’abateguye igiteramo bavuga ko hinjira uwufise ubutumire ariko hari ababuhabwa bahashitse abandi bagasubizwa inyuma. Hari amadidane y’uko ubutumire bwatanzwe.