Gitega : Abanyagihugu basabwa gutanga amafaranga bakorerwe amabarabara

Kuva mu mwaka w’2010, abanyagihugu baba mu gisagara ca Gitega baratanguye gutanga amafaranga yo gukora amabarabara mu buryo bwa kijambere, bwo gusasa amabuye hasi.

Muri uwo mugambi ufashwa mu mugongo n’ibanki y’isi yose, abanyagihugu baterera ibice 2 kw’ijana, ibanki y’isi yose ikabaha 98 kw’ijana. Gushika mu mwaka w’2013, abanyagihugu bo mu ma karitiye atandukanye y’umurwa mukuru w’intara ya Gitega, bakaba batari bwatange amafaranga yasabwa kugira bakorerwe amabarabara ku buryo bwa kijambere. Monfort Bigirimana, umuhanuzi wa buramatari wa Gitega ajejwe iterambere, akaba ahumuriza abanyagihugu ko abamaze gutanga amafaranga, ubu ari mu kigega ca PTPCE, ariko akabandanya asaba abanyagihugu bataratanga ayo mafaranga ko boyashikana vuba, kugira bakorerwe amabarabara nk’abandi bo mu bindi bisagara.

Avuga ko umugambi wo gukora amabarabara yo mu gisagara ca Gitega, ari umugambi ntabanduka, uherana n’umwaka w’2015. Igisagara ca Gitega kikaba kigira kabiri havuye Bujumbura, umurwa mukuru w’Uburundi.