Kuki Fariouz yapfukamye imbere y’abantu umunsi wa Top Ten Tube Music Awards 2014?

Inyuma y’ihiganwa TopTenTube Music Awards 2014 aho Fariouz yaronswa ku gatwe kiwe ubushimwe butatu, uwo muririmvyi akunzwe cane mu Burundi yaragaragaje umunezero avuga ko itsinzi yiwe ayikesha abakunzi biwe. Yaranasiguye igituma yaciye apfukama imbere y’abari aho.

Big Fariouz agiye gutora agashimwe ka gatatu mw’ihiganwa TopTenTube Music Awards 2014, yaciye apfukama imbere y’abantu, ku ruhimbi ibirori vyariko biberako. Apfukamye yavuze mw’ijwi ririmwo ibishobisho ko ubushimwe ata bubereye, ko ahubwo bwari guhabwa abakunzi biwe iyo bava bakagera, ati :" Abakunzi banje nibo bangaba, nibo bantunze, nibo ba Patrons banje, nibo batuma jewe mba Fariouz". Abo abashimira ko kuva agifata mu minwe umwuga wo kuririmba atako batakoze ngo ashike ku ntambwe ageze ko uno munsi. Fariouz yarashimiye abamenyeshamakuru bose iyo bava bakagera.

Inyuma yaho, twaramubajije ko yari yiteze ubwo bushimwe, Fariouz ati:" Ntavyo nari niteze cane ariko ico nzi n’uko nakoze cane muri uwo mwaka, ndonka agashimwe ntakaronka nta ntege vyonciye." Fariouz ati:" Ngiye kubandanya nkora gusumba uko nahora kandi abakunzi banje sinzobatetereza".

Tubibutseko ubushimwe butatu yaburonkejwe mu bisata bikwirikira:

1) Ururirimbo "Yahaya" rwa Big Fariouz rwahawe amajwi benshi ivyo bita "Choix du Public mu kiganiro « AKIWACU »

2) Big Fariouz yatowe nk’umuririmvyi wa mbere w’umwaka w’i 2014,

3) " Who you are" ya Big Fariouz na Samantha yabaye indirimbo yakorewe hamwe ( Meilleure Collaboration),

Ikindi twobibutsa n’uko uwo muririmvyi amaze igihe ari mu baririmvyi bariko bakoresha ibiteramo k’ubwo ubuserukizi bwa Brarudi mw’ihiganwa Primusic rizorangira kw’igenekerezo rya 31 Myandagaro.

Umviriza ururirimbo "Yahaya" rwahawe amajwi menshi n’abakunzi barwo n’abakunzi ba Fariouz.