La Haye : Umwe mu barwanyi b’Ubuganda yumvirijwe

Dominic Ongwen Wai Wai, umwe mu bayobozi b’umuhari LRA (Armée de résistance du Seigneur) yumvirijwe muri sentare y’ i La Haye.

Uwo yari amaze iminsi aronderwa kubera ivyaha bikomeye vyo mu ntambara yakoze mu bihugu vya Ouganda na Centrafrika, Dominic Ongwen akaba yumvirijwe ubwambere n’umucamanza kuri uyu wa 26 Nzero mu gatondo. Dominic Ongwen yoba yari umwe mu bayobozi ba kimwe mu birindiro bikomeye vya LRA citwa Sinia, kandi yari umuntu yegereye cane Joseph Kony umukuru w’abo barwanyi bafatwa nk’intagondwa.

Dominic Ongwen yavutse mu mwaka w’1975, akavuga ko inyuma y’aho yaciye afatwa n’abarwanyi baramunyuruza, igihe yari afise imyaka 14 y’amavuko, ajanwa mw’ishamba, ubu akaba yari amaze imyaka hafi 27 ari mw’ishamba mu mihari irwana, iyogomvya ibihugu cane cane vya Kongo iharanira intwaro rusangi, Ouganda na Centrafrika.

Wai Wai rero akaba yagirizwa ivyaha 7 vyo mu ntambara harimwo icaha co kwica urw’agashinyaguro, ivyaha vyo mu ntambara, ubwicanyi budasanzwe, kugira abantu imbohe, hamwe n’ibindi. Ivyo vyaha vyose akaba yavyagirijwe mu mwaka w’2004, mu ntambara yagize mu gihugu c’Ubuganda. Urubanza rwiwe rero rukaba ruzosubira kwumvirizwa ku wa 24 Myandagaro uwu mwaka.