Léonce Ngendakumana : Hakwiye kuza abategetsi biyumvamwo iragi rya Ndadaye

Mu Burundi hariho ibimenyetso vya demokarasi n’ubwo abantu batotezwa, kuko abanyagihugu barashikiriza ico biyumvira bakwongera bakanamenya ivyabo ingene biriko biratunganywa, nkuko bishikirizwa na Leonce Ngendakumana, umukuru w’umugambwe Sahwanya Frodebu.

Kubw’uwo arongoye umugambwe washinzwe na Ndadaye Melchior, incungu ya Demokarasi mu Burundi, hari amashirahamwe, amaradiyo, imigambwe n’ubwo yaciwemwo imice, isemerera ikavuga ibitangenda mur’iki gihugu mu bisata vyose. Igisigaye n’uko haza abategetsi, intwaro n’inzego biyumvamwo iragi rya Ndadaye ko umugambwe utsinze utaba utsindiye abanywanyi bawo ahubwo uba utsindiye abanyagihugu bose.

Léonce Ngendakumana yabishikirije kuri uno wa kabiri igenekerezo rya 21 Gitugutu 2014, mu gihe Uburundi buriko bwibuka imyaka 21 irangiye umuhisi Melchior Ndadaye agandaguwe bunyamaswa n’akarwi k’abasirikare, mu nyuma naho hakaba haciye hakurikira ubwicanyi bw’agahomerabunwa.

Ibirori vyo kwibuka iyo ncungu ya demokarasi vyatangujwe n’inkuka y’imisa yasomewe kuri Cathédrale Regina Mundi na musenyeri Evarisito Ngoyagoye. Vyaciye bibandaniriza ku cibutso c’iyo ncungu aho abategetsi batandukanye bashize ingori z’amashurwe ku ntatemwa y’uwo muhisi. Umukuru w’igihugu Petero Nkurunziza n’umupfasoni wiwe, abaserukira ibihugu vyabo hano mu Burundi, imiryango y’abiciwe rimwe na Ndadaye, imigambwe yemewe n’amategeko, n’abandi. Inyuma yaho haciye haba umwanya w’agacerere baca bashiramwo ijambo ry’umuhisi Melchior Ndadaye yashikirije ahejeje gutsinda amatora yo mu mwaka w’i 1993.

Haracari abatotezwa kubera ivyiyumviro vyabo

Abo mu mugambwe Sahwanya FRODEBU umuhisi Melchior Ndadaye akomokamwo baremeza ko hari intwaro rusangi mu Burundi n’ubwo hakiriho abatotezwa kubera ivyiyumviro vyabo. Izo nziraguhemuka zisaba abategetsi batowe gutwarira bose. Ku vyerekeye urubanza rwa Melchior Ndadaye rwandindiye rumaze imyaka 21 rutarasomwa, Léonce Ngendakumana ata ikosa ku butungane bw’Uburundi, akabwagiriza kuba butigenga kuko usanga imanza zitari nke zisomerwa mu migambwe.

Tubamenyeshe ko ivyo birori vyari vyitabwe n’abanyacubahiro batandukanye, abagize Reta y’Uburundi, umupfasoni wa Melchior Ndadaye n’umuvyeyi wa Ndadaye, hamwe n’umuryango w’iyo ncungu ya Demokarasi. Abandi bari bateye iteka ivyo birori nn bamwe muabahoze barongoye igihugu c’Uburundi Domisiyano Ndayizeye, Sylvestre Ntibantunganya, abarongoye imigambwe yemewe n’amategeko, hamwe n’abaserukira ibihugu vyabo hano mu Burundi.