Accueil > Amakuru > u Burundi > Leta y’Uburundi yahojeje umuryango wa Musenyeri Eliya Buconyori
Leta y’Uburundi yahojeje umuryango wa Musenyeri Eliya Buconyori
lundi 1er Ndamukiza 2013
Nk’uko tubikura mu rwandiko rwashizwe ahabona na Leta y’Uburundi, kuri uyu wa mbere, igenekerezo rya mbere Ndamukiza 2013, biciye ku munyamabanga n’umuvugizi wayo, Philippe Nzobonariba, Leta y’Uburundi yakiranye umubabaro mwinshi urupfu rwa Musenyeri Eliya Buconyori rwashitse ku musi w’Imana wa Pasika igenekerezo rya 31 Ntwarante 2013.
Urupfu rwiwe rwakiranwe umubabaro mwinshi muri Leta y’Uburundi, mu bari basangiye uburongozi bw’ishure Universite Espoir d’Afrique, n’ishengero Methodiste Libre yari asanzwe aserukira imbere y’amategeko.
Abarundi bariboneye uruhara yagize mw’iterambere ry’igihugu, mu kugarukana amahoro, mu kwubaka ibitaro n’amashure, n’ibindi vyinshi.
Umunyamabanga n’umuvugizi wa Leta Philippe Nzobonariba abandanya amenyesha ko Musenyeri Eliya Buconyori azokwama ari umuntu w’ubukomezi budasanzwe kandi w’akarorero kubw’ivyo yakoreye igihugu, abarundi harimwo urwaruka, n’abagize ishengero yaserukira imbere y’amategeko. Arangiza ahoza umuryango n’abarundi kw’izina rya Leta, asaba Imana ko yomuronsa ikibanza akwiriye mu bwami bwayo
Egide Nduwimana
