Liberiya: Charles Taylor yarunguruje urubanza

Charles Taylor,yigeze kuba arongoye igihugu ca Liberiya yasubiye kurenguka imbere ya sentare y’i La Haye muri Holande,akaba ariko aragerageza kuraba ko ivyaha vy’intambara yagirizwa vyohanagurwa.

Sentare idasanzwe ishigikiwe n’ishirahamwe mpuzamakungu ONU iburanisha ivyaha vyakorewe mu gihugu ca Sierra Leone igiye kumara iminsi ibiri yumviriza Charles Taylor.
Mu mwaka uheze ,Charles Taylor yari yaciriwe imyaka 50 yo gupfungwa kubera yafashije abarwanyi bo mw’ishamba muri Sierra Leonne bakoze ivyaha vyo kwica no gufata ku nguvu.

Ababuranira Charles Taylor bobo bavuze ko sentare yamwagirije ivyaha itamitswe ijambo n’abandi kandi ko n’igihe ivyo vyaha vyakorwa Charles Taylor atari muri Sierra Leonne.
Ubucamanza bwobwo bukaba busaba ko igihano c’imyaka 50 yo gupfungwa yaciriwe cokwongerekana ngo kuko yagize uruhara rukomeye mu gutuma ivyo vyaha biba.